የማኅበራዊ ሳይንስ ምሁራን ለዩኒቨርሲቲው ማህበረሰብ ውይይት መነሻ የሚሆኑ በወቅታዊ የሃገሪቱ ጉዳዮች ላይ ያተኮሩ ጥናታዊ ጽሑፎችን አቀረቡ።

የኮተቤ የትምህርት ዩኒቨርሲቲ የአካዳሚክ ጉዳዮች ም/ፕሬዝዳንት የሆኑት ዶ/ር ሽመልስ ዘውዴ የመክፈቻ ንግግር ባደረጉበት ወቅት እንዳሉት፤ እንደዩኒቨርሲቲ ምሁር በእነዚህ ወቅታዊ በሆኑ ርዕሰ ጉዳዮች ላይ መወያየት ለሃገር ወሳኝ መሆኑን ገልፀው፤ ሃገራችን ባለፉት ሁለት ዓመታት ሳትፈልግ በገባችበት ጦርነት ከፍተኛ የሆኑ የሰብዓዊና ቁሳዊ ጉዳቶች መድረሳቸውን ተናግረዋል። መነሻ ጽሑፎች የሃገራችንን ቀጣይ አቅጣጫዎች የሚጠቁሙ ከመሆናቸውም ባሻገር በጦርነቱ ወቅት የወደሙ ቁሶችን በምን መልኩ እንደሚተኩ እና ከጦርነቱ በኋላ ራሳችንን እንዴት አረጋግተን ወደፊት መቀጠል እንችላለን የሚሉት ሀሳቦች ላይ ያተኮሩ መሆናቸውን አስገንዝበዋል።

ዶ/ር ሽመልስ አያይዘውም፣ ሃገርን ከውጪ ከሚመጣ ጠላት መከላከል ብቻ ሳይሆን በሃገር ውስጥ የሚከሰቱ ግጭቶችን እንዴት አድርጎ ማስቀረት እንደሚቻል በሚያስገነዝቡ ውይይቶች ላይ መሳተፍ እንደግለሰብ ብቻ ሳይሆን እንደሃገርም ጠቀሜታው የጎላ መሆኑን ተናግረዋል።ዶ/ር አየነው ብርሃኑ “ድህረ ግጭት የሠላም ግንባታ በኢትዮጵያ” በሚል ርዕስ እንዲሁም ዶ/ር አልማው ክፍሌ “የሃገር ፍቅርና የሃገር ግንባታ ትስስር በኢትዮጵያ” በሚል ርዕስ የውይይት መነሻ ሐሳብ አቅርበዋል። የጉባዔው ተሳታፊዎችም በርካታ አስተያየቶችና ጥያቄዎች ያነሱ ሲሆን፣ የጽሁፎቹ አቅራቢዎች ምላሽና ማብራሪያ ሰጥተዋል።

የኮሚዩኒኬሽን ጉዳዮች ዳይሬክቶሬት